Бичлэг тандагчСургалтын блогийн зөвлөмж/ Багш Б.Мөнгөнчимэг
Сургалтын блогийн зөвлөмж
Багш: Б.Мөнгөнчимэг
Блогийн хаяг: www.munguuzb.blogmn.net
Блогийн нэр: Сургалтын блог
Бичлэгийн ангилал: 5 /Цахим хичээл, цахим сургалт, шалгалт, цахим тест, шалгалт, зөвлөгөө/
Найзууд: 5
Холбоос: 1
Нээсэн огноо: 2012.01.26
Бичлэгийн тоо: 15
8-р ангийн сурагчдад “Тойрог, дугуй, цагираг”, 7-р ангийн сурагчдад “Энгийн бутархайг нэмэх хасах”, “Олонлог”, “Тоон шулуун дээрх 2 цэгийн хоорондын зайг олох” сэдвээр цахим хичээл байршуулсан нь сайн байна.
Анхаарах зүйл:
Урвуу хамааралтай функц, Конус-11-р анги гэсэн 2 цахим хичээл, Тамхины хор уршиг, Танилцуулга гэсэн гарчиг бүхий 2 зөвлөмжийг хязгаарлалттай бичлэг хэлбэрээр байршуулжээ.
Хязгаарлалттай бичлэгийг зөвхөн найзууд үзэх эрхтэй байдаг тул эцэг эх, сурагчдад зайн сургалт явуулах, сурган хүмүүжүүлэх зөвлөгөө өгөх зорилгоор хөтөлж байгаа сургалтын блогийн бичлэгүүд хязгаарлалттай байж болохгүй билээ.
Багшийн сонгосон энэ загварын дэвсгэр өнгө тас хар байгаа нь сургалтын блогт тохиромжгүй гэж бодож байна. Сурагчдад зориулсан учраас гэгээлэг өнгө сонгох нь зүйтэй болов уу.
Зөвлөмж:
Бичлэгийн ангиллыг дор дурдсан байдлаар үүсгэж болно. Үүнд:
- Мэдээ мэдээлэл- Зар мэдээ
- Бие даалтын даалгавар
- Эцэг эхчүүдэд сурган хүмүүжүүлэх зөвлөгөө
- Сурагчдад зөвлөгөө
- Цахим судалгаа гэх мэт
Сургалтын болон хичээлээс гадуур зохион байгуулагдаж буй үйл ажиллагааг сурталчилсан мэдээ мэдээлэл, хариуцаж ажиллуулдаг хүүхэд хөгжүүлэх сонгон, секц, дугуйлан, клубын үйл ажиллагааны төлөвлөгөө, хуваарь, зохиогдож буй арга хэмжээг сурталчилсан фото зургаар баяжуулсан мэдээ мэдээллийг тогтмол байршуулах нь багшийн сургалтын блогт зочлох эцэг эх, сурагчдын тоог нэмэгдүүлэх болно.
Мөн
- Рациональ тэгшитгэл, тэнцэтгэл биш, систем
- Иррациональ тэгшитгэл ба тэнцэтгэл биш
- Илтгэгч тэгшитгэл, тэнцэтгэл биш
- Логарифм тэгшитгэл, тэнцэтгэл биш
- Тригонометр
- Интеграл
- Магадлал гэх мэтээр бүлэг сэдвээр ангилал үүсгэх, эсвэл
- 7-р анги
- 8-р анги
- 9-р анги
- 10-р анги
- 11-р анги гэх мэтээр хэддүгээр ангид хичээл зааж буйгаас хамаарсан бичлэгийн ангилал үүсгэж, бие даалтын даалгавар, зайн сургалтын хичээл, үнэлгээний цахим тест байршуулахад болох юм.
TV хичээл байдлаар бэлтгэсэн хичээл нь зөвхөн зайн сургалтын хичээлд хамаарагдана гэсэн буруу ойлголт багш нарт байдаг бөгөөд
- Бүлэг сэдэв, нэгж хичээлийн хөтөлбөрийн сэдвээр бие даалтын даалгавар тодорхой хугацаанд өгөөд сурагчид даалгавраа хураалгуулсны дараа зөв хариултыг байршуулах
- Хоцрогдолтой сурагчдад зориулсан цуврал хичээл
- Түлхүү түвшний сурагчдад зориулсан цуврал хичээл байршуулах зэргээр зайн сургалт явуулж болно.
Зайн сургалтын хичээл нь аудио, видео, PDF, Хэрэглээний програмууд ашиглаж хийх гэх мэтээр ямар ч хэлбэртэй байж болно.
Жнь: Квадрат тэгшитгэл бүлэг сэдвийг үзэж эхлэхийн өмнө хичээлийн нийт цаг, сурагчдын эзэмших мэдлэг, чадвар, бие даалтаар ямар даалгавар хийх, хэзээ гүйцэтгэсэн байх, шалгалт хэзээ авах, шалгалтын жишиг даалгавар гэх мэт сургалтын дэлгэрэнгүй мэдээллийг блогтоо байршуулах хэрэгтэй юм.
Улмаар тухайн сэдвээр бие дааж бодох 20-30 бодлогыг байршуулаад сурагчид даалгавраа хураалгах сар, өдрийг тодорхой зааж өгнө.
Сурагчид бие даалтын даалгавраа хураалгуулсны дараа зөв хариултыг үнэлгээтэй хамт байршуулна. Зөв хариулт байршуулсны дараа сурагчдын дэвтрийг буцааж өгч, хийсэн даалгавраа багшийн зөв хариулттай тулгаж, алдаагаа олох, өөртөө үнэлгээ өгөх, буруу бодсон бодлогоо зөв болгож бодох даалгавар өгнө.
Багш сурагчийн бодсон бодлогыг зөв, буруу гэж зассан үед сурагч үнэлгээгээ харахаас яг юун дээр алдаж вэ гэдгээ анхаардаггүй тал байдаг тул сурагчаар өөрөөр нь алдааг олуулах нь ямар нэг зүйлд дүн шинжилгээ хийлгэж сургах, зөв бодолтыг дахин хийлгэх нь ойлгоогүй зүйлээ мэдэж авахад тустай байдаг.
Бие даалтаар 50 бодлого өгөх шаардлагатай үед тодорхой хугацаа зааж, 10-15 бодлогоор цувуулж өгөх нь тухайн даалгаврыг хүлээж авч байгаа сурагчийн сэтгэл зүйд эерэгээр нөлөөлж, даалгавар гүйцэтгэх сурагчдын тоо, гүйцэтгэлийн чанарыг нэмэгдүүлдэг. 50 бодлого яаж бодно доо гэж хүлээж авах, зөвхөн 10 бодлого л бодно гэж бодохын ялгаа их байдагт оршино.
Тэргүүний сурагчид, манай ангийн бахархал гэсэн ангилал нээж, математикийн хичээлээр болон дааж авсан ангийнхаа тэргүүний сурагчдын фото зурагтай мэдээллийг байршуулах нь эцэг эхийн хүүхдээрээ бахархах сэтгэл, сурагчийн идэвх чармайлт, өөртөө итгэх итгэлийг нэмэгдүүлэх сайн талтай байдаг.
Сургалтын блог тогтмол хөтөлснөөр багш хөгжих, интернэтийн болон компьютерийн мэдлэг, чадвар дээшлэх, багшийн хөгжлийг дагаад эцэг, эх, сурагчдын интернэт ашиглах чадвар сайжрах, орон зай, цаг хугацаанаас үл хамаарч зайн сургалтад хамрагдах, сурган хүмүүжүүлэх зөвлөгөө авах ач холбогдолтой юм.
Төсөл хэрэгжиж буй сургуулиудын багш нарын дунд зарлагдсан “Шилдэг сургалтын блог” шалгаруулах уралдаанд амжилттай оролцоно гэдэгт итгэж байна.
Амжилт хүсье!!!
Зөвлөмж бичсэн: Төслийн зохицуулагч П.Энхмаа
